علاج ناکام یا کامیاب ۔ فیصلہ آپ کریں ۔ حسین قیصرانی

کئی سال پہلے کی بات ہے کہ اِن محترمہ نے اپنا علاج کروایا تھا۔ما شاء اللہ وہ عالی شان ڈیزائنر ہیں اور اُن دنوں ایک مشہور ادارے کے ساتھ اٹیچ تھیں مگر بہت ہی زیادہ پریشانی اور ناقابلِ برداشت سٹریس میں تھیں۔

پہلے دو ماہ ہمارے ستارے تھوڑا بہت مل گئے مگر بعد میں علاج میں واضح کامیابی نہ ہونے، اُن کی توقعات زیادہ ہونے یا میری کسی گستاخی کی وجہ سے مزاجِ نازک بپھرتے چلے گئے ۔

ایک دن شدید غصہ میں مجھے خوب سنائیں بلکہ سچ کہوں تو میرا کچھ نہ چھوڑا۔ میری تمام خامیاں کھل اور کھول کر سنانے کے بعد انہوں نے اعلان کیا کہ علاج مکمل ناکام بلکہ انتہائی فضول ثابت ہوا ہے۔

معلوم نہیں کہ کیوں اور کیسے مگر پچھلے سال انہوں نے گوگل پر میرے لئے بہت اچھا ریویو پوسٹ کیا۔ پھر کبھی کبھار اپنی کوئی کامیابی یا خوشیاں شیئر کر کے شکریہ کا میسیج بھیج دیتی تھیں۔

کل پھر میسیج آیا کہ وہ ایک یونیورسٹی میں بطور جج بلائی گئی تھیں۔ جس طرح ان کا والہانہ استقبال ہوا اور سٹوڈنٹس نے بھرپور تعریف کی تو یہ ناچیز پھر ان کو یاد آ گیا:

ڈاکٹر حسین قیصرانی ! میں دل سے آپ کی احسان مند ہوں۔ زندگی کا مشکل ترین دَور تھا۔ آپ نے اس وقت میرا بھرپور ساتھ دیا۔ آپ کا شکریہ۔

—————————–

بعض اوقات بظاہر ناکام ترین کیس بھی علاج چھوڑنے کے سالوں بعد بھی کامیابی کا احساس دلاتے رہتے ہیں۔